Nagpalagip ti maysa a delivery rider manipud iti ili ti Sinait kadagiti customer a no adda order-da iti online ket alaenda nga insigida no maideliveren iti pagtaenganda.
Dayta ket gapu iti kapadasanda kadagiti dadduma a customer a naurnongen dagiti parcel-da ngem saanda nga awaten wenno agicancel-da.
Iti pannaki-uman ti Bombo Radyo Vigan ken ni Jay-R Ramos, trabahoda nga agpayso ti agideliver kadagiti parcel ngem kunana a panunotenda koma met ti pagsayaatanda a mangidandanun nangruna dagiti pumanaw iti pagtaenganda nga awan ti ibatida a pagbayad.
Innayonna pay a gapu ta kayatda a malag-anan dagiti kargada a parcel ket ibatida lattan ta mangnamnamada nga agtungpal dagiti dadduma iti karida nga ipatuloddanton ti bayadda iti GCASH ngem no madanonen ti malem a panag-remitda ket kapilitan a kuartadanto manen ti pagabunarda ta awan met ti inted a bayad ti kustomer.
