Nagpanawagan iti insigida nga imbestigasyon ni House Senior Deputy Minority Leader ken Mamamayang Liberal party-list Rep. Leila de Lima maipanggep iti operasyon nga insayangkat ti 79th Infantry Battalion iti Philippine Army idiay Toboso, Negros Occidental a nakatayan iti sangapulo ket siam nga indibidual.
Segun ken ni de Lima, rumbeng a kitaen ti seryoso nga alegasyon nga adda panaglabsing gapu iti pannakatay iti sangapulo ket siam nga indibidual kadua ti UP Student a ni Alyssa Alano ken community journalist a ni RJ Ledesma.
Kinunana nga agipila iti resolusyon iti Kamara de Representantes tapno makapaayab iti maysa a congressional investigation tapno maammoan iti pudno a pasamak.
Ni De Lima ket dati a chairperson iti Commission on Human Rights sakbay a nagbalin a Justice secretary ken senador.
