Nangisayangkat ti maysa a “Mass for Truth” ti sumagmamano a miembro ti Catholic Church kas panangsuportar ti House prosecution team iti umadanin nga impeachment trial ni Vice President Sara Duterte inton July 6.
Naisayangkat ti misa iti Chapel of the Nativity of the Immaculate Conception Cathedral idiay Cubao, Quezon City iti panangidaulo ti Clergy for Good Governance kas pannakikaysa iti prosecution.
Dimmar-ay dagiti opisyal a prosecutor pakairamanan da House Lead Prosecutor Atty. Gerville “Jinky Bitrics” Luistro, mangibagi a da Rep. Joel Chua, Rep. Leila de Lima, Rep. Lorenz Defensor, Rep. Arlene “Kaka” Bag-ao, ken Rep. Ysabel Maria “Bel” Zamora, karamanen dagiti private prosecutor.
Iti homily ni Msgr. Mel David, kinunana nga iti umadanin nga impeachment trial ket maysa a napateg a gundaway para iti pagilian ken panawagan iti kinapudno ken pannakadusa.
Inallukoyna dagiti prosecutor nga ipakita ti ebidensia nga addaan iti tured, laing ken pannarabay iti pammati, ken saan a mangnamnama laeng iti kabaelan a legal no diketdi iti moral nga akem iti pagilian.
