Inruar ti Department of Budget and Management (DBM) ti P362 million tapno mapadaras ti rehabilitasyon ken panagsimpa kadagiti nadadael a pasilidad ken istruktura iti gobierno iti napasamak a magnitude 7.8 a ginggined idiay Sarangani, General Santos City ken South Cotabato.
Dayta ket kasaruno ti bilin ni Pres. Ferdinand Marcos Jr. nga insigida a tulongan dagiti komunidad a naapektaran iti ginggined idi June 8 iti dadduma a paset idiay Mindanao.
Segun ken ni DBM acting Secretary Kim Robert de Leon, ti pondo ket maala iti Local Government Support Fund ken insigida a maipatulod kadagiti apektado a local government unit tapno insigida a maisayangkat ti pannakasimpa dagiti nadadael nga istruktura iti gobierno.
Kinuna ni de Leon a gagem ti insigida a pannakairuar ti pondo a maisubli dagus ti normal a biag dagiti naapektaran nga umili ken masigurado nga awan ti mapanawan a Pilipino iti panawen a panagkasapulan.
