VIGAN CITY – Rinibo a tattao iti nagbakwit kadagiti dua nga ili idiay Maui island gapu ti napasamak a brushfire nga agingga itatta ket saan pay laeng nga ammo dagiti otoridad nu anya iti nagtaudan na.
Segun ti report iti Bombo Radyo Vigan ni Bombo International Correspondent Rey Patao a taga-Bantay, Ilocos Sur, inbaga na a ti nauram a paset ti isla ket sigud a mamul-mulaan idi ti unas ngem manipud idi nabay-bay-an ket adun dagiti nagtubo a root ken isu iti pangibelbellengan dagiti tattao kadagiti nagarsangan da ti sigarilyo ken pagpooran da pay kadagiti saan na kayaten nga alikamen da.
Naidekleraren ti state of emergency iti lugar ta 3,000 acre iti kalawa ti naapektaran ti brushfire idiay central valley ti Maui ken saan a kinabaelan dagiti otoridad a sebseban ti apoy ta napuskol ti asok ken delikado ti angin na iti lugar.
Malaksid kadagiti agindeg idiay Maalea ken Kihei a nagbakwit, adu kadagiti negosyo iti naapektaran, pati ti powerplant nga agsupsuplay iti kuryente iti intero a Maui.
Adu pay dagiti flights idiay Kahului airport a nai-divert idiay Honolulu ken adda met dagiti nakanselar gapu ti nasao a brushfire.
Pati dagiti by-pass roads, main highways iti lugar ket napaserraan ngem uray pay kasta, awan met ti naipadamag a nadunor wennu nadangran gapu ti pasamak kas pinasingkedan ni Patao.
