VIGAN CITY – Time management ti nagbalin a wagas ti taga-Candon, Ilocos Sur a ni Gretchen Estavillo, Rank 5 iti Special Professional Licensure Examination for Professional Teachers nga adda ita idiay Dubai, United Arab Emirates.
Iti pannaki-uman ti Bombo Radyo Vigan ken ni Estavillo, saanna a ninamnama ti pannakairamanna a topnotcher ta ti laeng inarapaapna ket ti makapasa ken nagreview laeng iti bukodna.
Uray narigat ta adu nga oras ti kasapulan ket kinabaelanna nga imanehar ti orasna kas maysa a mangisursuro ta kalpasan ti panagtrabahona ket isu met ti gundawayna nga agreview.
Ni Estavillo ket nagturpos iti kurso a Bachelor of Science in Biology iti University of Northern Philippines, nagserbi a high school teacher iti St. Joseph Institute-Candon ken college teacher iti Ilocos Sur Community College idi adda pay laeng iti Pilipinas idinto nga idiay UAE ket primary school teacher.
Napan iti benneg ti panagisuro agsipud ta kunana nga isu ti passion-na numan pay sabali a kurso ti inturposna ta ti arapaapna idi damo ket agbalin a doktor.
