Naalaan iti nasurok kumurang 1.27 a gramo ti mapapati a shabu ti dati a drug surrenderer iti naisayangkat a search warrant operation idiay Barangay Vacunero, Sto. Domingo, Ilocos Sur itay 12:25PM.
Ti suspek ket agtawen iti limapulo ket maysa, naasawaan, awanan trabaho nga agnaed iti nasao a lugar.
Naisayangkat ti search warrant operation gapu iti panaglabsing ti suspek ti Republic Act 9165 a nairuar idi August 29 babaen ti Executive Judge iti Regional Trial Court Branch 72, Narvacan a gappuanan ti pannakakemmegna.
Iti pannaki-uman ti Bombo Radyo Vigan ken ni PCapt. Joseph Fieldad a Chief of Police iti Sto. Domingo Municipal Police Station, adda nangipakaammo kadakuada a nagsubli iti ilegal nga aramid ti suspek isu a namonitor manipod pay laeng idi Agosto ket idi kalman isun ti pannakaisayangkat ti search warrant.
Segun ken ni Fieldad, apaman a naiserbi ti search warrant ket naidalan ti drug test ti suspek ket nagpositibo iti panagaramat iti illegal a droga.
Naala manipod iti suspek ti drug evidence iti mapapati a shabu nga aggatad ti P8,636 a naipan iti siam a piraso iti heat-sealed transparent plastic sachet ken non drug evidence a maysa a karton ti posporo, maysa a gray coin purse ken maysa a disposable red lighter.
Nagpawagan ni Fieldad kadagiti umili iti pannakitinnulongda nu adda madlawda nga illegal a maar-aramid iti lugarda tapno matignayan iti kapulisan.
VIDEO – PCAPT. JOSEPH FIELDAD
