Saan a damo a nakemmeg ti lalaki a naiwayatan iti buy-bust operation idiay Barangay Damacuag, Sta. Lucia ta datin a nakemmeg gapu met laeng iti illegal a droga.
Ti suspek ket taga-Barangay Calumpang, Binangonan, Rizal a maysa a high value target ken miembro ti Sputnik Gang.
Iti pannaki-uman ti Bombo Radyo Vigan ken ni PCapt. Jake Riberal iti Sta. Lucia Municipal Police Station, naka-under probation ti suspek ngem intultuloyna latta iti illegal nga aktibidadna a gappuanan ti pannakakemmegna ditoy probinsia.
Segun ken ni Riberal, apaman a naipakaammo kadakuada nga adda agilaklako iti droga iti nasao nga ili ket insayangkatda iti monitoring ken operasyon kontra iti suspek a gappuanan iti pannakakemmeg ken pannakaala kenkuana iti dua a heat-sealed transparent plastic sachet a naglaon iti 187 a gramo iti shabu nga aggatad iti P1,271,600 ken iti buy-bust item.
Kinuna ni Riberal a kadagiti napalpalabas a nakemmegda a suspek ket naammoan a maymaysa laeng iti grupoda isu a patienda a dagiti agiwarwaras iti illegal a droga iti ili ket naggapu iti sabali a lugar.
Iti agdama ket mayur-uray iti resulta ti laboratory a dimmalanan ti suspek pakairamanan iti naala a droga kenkuana.
