Natay ti dati a kapitan ti barangay idiay Sagneb, Bantay, Ilocos Sur ta pinaltugan ti kabsatna nga agdama a kapitan iti mismo nga aldaw ti Paskua.
Iti pannaki-uman ti Bombo Radyo Vigan ken ni Police Captain Donaldson Pagalanan, mapan agideliver ti biktima iti videoke babaen iti kurong-kurong a naglugananna idin ta sinitarna ti madi a pannakaiparking ti lugan ti suspek nga isu ti puon ti nagririanda ken nangpaltogan ti suspek iti biktima.
Narekobre manipud iti nakapasamakan ti pammaltog ti lima nga empty shell ti caliber 45.
Naitaray iti balay-pagagasan ti biktima ngem saanen a nakalasat gapu kadagiti fatal a tama iti bagina nangruna iti bakrangna.
Nadakamat pay a naanawa ti suspek babaen iti maysa a kabagianna sakbay a naglibas kalpasan ti pasamak.
Kabayatanna, nakemmeg met ti suspek babaen iti hot pursuit operation ken karaman nga insukona ti paltog nga inaramatna.
