Daan a susik ti makitkita a rason iti napasamak a pammagkong idiay Barangay Ayusan Norte, Vigan City.
Nabigbig ti suspek a ni Mario Rabena Cabarloc, agtawen iti uppat a pulo ket tallo, agnaed iti nasao a lugar.
Ti met biktima ket ni Joel Rabena Martinez, agtawen iti uppat a pulo ket dua, tricycle driver, tubo iti Barangay Ayusan Norte ngem aggigyan idiay Barangay Rugsuanan, Vigan City.
Basar iti statement dagiti tattao a karaman a nagiinom iti pagtaengan ti kasinasinda, adda nagapaanda a puon ti pimmanawan ti suspek.
Nagdesisyon ti biktima nga agturong iti lamay ti ulitegna; ket idi nakasangpet, nakitana ti suspek ket sinangatna, puon ti nagapaanda.
Idi rauten koman ti biktima ti suspek, nangasot ti kutsilyona ti suspek ket dinuyokna iti naminsan ti tyan ti biktima sa naglibas.
Bayat ti pannakisarsarita dagiti pannakabagi ti linteg kadagiti witness, bigla a simmangpet ti suspek a simmuko, ken nangaklun iti pannakairamanna iti insidente, kasta payen nga imbagana no nangidulinanna ti kutsilyo.
