VIGAN CITY – Makikamkammayeten ti Civil Service Commission iti National Bureau of Investigation para iti naal-alisto a pannakabigbig no siasino ti nagiwaras iti fake news babaen iti social media mainaig iti automatic a pannakapasa dagiti aplikante ti CSC examination gapu iti COVID19 pandemic.
Ti nasao nga addang ket tapno maikkan iti usto a pannusa ti nagiwaras iti fake news ta posible a sangwenna ti kaso nga “anti-cheating law” ken “misconduct”.
Inlawlawag ni CSC Regional Director Jiggs Lardizabal a maaddaanda laeng iti eligibility no isuda ken naipasada iti exam ken babaen kadagiti special laws a pakairamanan ti Honor Graduate Eligibility (PD907), Sangguniang Bayan Member Eligibility (RA 10156), Barangay Official Eligibility (PD1569) ken dadduma pay.
Kabayatanna, mayur-uray pay laeng no kaano ti maituding a schedule ti examination kalpasan a naisanud gapu iti pangta ti COVID19 ken patta-pattaen ti opisial nga inton October wenno November ti pannakaisayangkatna.
