VIGAN CITY – Nangiparuaren ti Ilocos Sur Provincial Government iti Executive Order a nakailanadan dagiti pagannurotan a masurot kadagiti natayan ken panagpumpon.
Dagiti immediate family members, kabagyan iti third degree of consanguinity ken dagiti kabbalay ti natay ti mapalubosan nga agbantay ken makipamunpon idinto a dagiti kapamilia wenno kabagyanna iti third degree of consanguinity nga aggapu iti sabali a probinsia ket mabalinda a bisitaen iti alas onse iti rabii agingga iti alas kuatro iti agsapa laeng ken malimitaran iti tallo a tattao ti tunggal panagbisita.
Saan a mabalin dagiti Returning Resident ken Returning Overseas Filipino nga ag-home quarantine iti balay a nakaimasayagan ti bangkay ken rumbeng a saan a lumabes ngem iti uppat nga aldaw ti panagtalinaed ti bangkay iti uneg ti pagtaengan.
Masapul nga adda logbook a pangisuratan dagiti mapan bumisita iti nagan, address, petsa, oras ti panagbisita ken contact number-da para ti contact tracing kasta payen ti panangsurotda kadagiti health protocols.
Maiparit ti agsusugal ken malimitaran dagiti aglugan tapno masurot ti social distancing ket dagiti aglabsing, nakadepende kadagiti Local Government Unit no ania ti maipakat a dusa kadakuada.
