Irusat ti Commission on Elections-Ilocos Sur ti massive voter education campaign inton umay a bulan tapno ipakita no kasano ti panagaramat iti automated counting machines sakbay ti 2025 midterm elections.
Iti pannaki-uman ti Bombo Radyo Vigan ken ni Provincial Election Supervisor Atty. Marino Salas, inton December 2 agingga Enero 30 ket maaramid ti road show caravan nga amin a barangay iti probinsia ket pasyarenda tapno maidemo dagiti baro a makina ken dagiti feature-na.
Kada aldaw ket maysa a barangay ti target tapno maisuro a naimbag kadagiti agbotos ti aramidenda no dumteng ti aldaw ti panagpipili ken saanen a mabayagan ti pila.
Gagemna pay a maipakita ti transparency ken accuracy ti COMELEC babaen kadagiti baro a makina ket maliklikan a maulit dagiti glitch iti naglabas nga eleksion.
Balakad ti opisial kadagiti agbotos a nasken nga amwenda a naimbag dagiti kandidato ken no ania ti isyu iti lugarda tapno makapilida a nasayaat.
Malaksid dayta ket inallukoyna ti amin a makipaset nangruna kadagiti saan a tech-savvy tapno ammoda ti ar-aramidenda.
