Idurduron ti Commission on Elections a maingato pay ti gastos dagiti kandidato iti kada botante iti panawen ti kampanya.
Segun ken ni Comelec Chairman George Erwin Garcia, saan a praktikal ken adayo iti kinapudno ti gasgastusen dagiti kandidato iti kada botante a maikabkabil iti Statement of Contributions and Expenditures.
Iti salinong ti linteg, tallo pisos laeng ti maipalpalubos a gastusen ti kandidato iti kada botante idinto a lima pisos met iti kada botante no independent candidate wenno awan pakaibilanganna a partido.
Pinasingkedan ni Garcia a saan daytoy a realistic ken aminado a mabalin a mapilitan nga agulbod ti dadduma a kandidato.
Gapu dayta, nagpanawagan ti poll chief iti kongreso nga ingato ti gatad a mabalin a gastusen kadagiti botante.
P25 ti maisingsingasing a limit iti gastos dagiti local candidates iti kada botante idinto a P50 met kadagiti national candidates.
