VIGAN CITY- Nainget a bantayan ti Commission on Election ti substitution of candidates para ti 2019 mid-term elections ta posible nga abusuen daytoy dagiti kandidato.
Ti pannakiuman ti Bombo Radyo Vigan kenni Comelec Spokesman James Jimenez, inlawlawag na a napateg ti substitution of candidates para kadagiti partido ta isu ti legal ken praktikal a remedyo no kas pangarigan adda kadakuada ti agsanud iti kandidatura na tapno saan a makurangan ti line up ti grupo.
Innayonna a saan a sakupen ti substitution dagiti independent candidates ta awan ti maapektaran a partido no agbabawi iti kandidato sakbay iti eleksyon.
Nakailanad iti Resolution Number 1043 nga agawat da ti substitution sakbay ti Nobiembre baente nuebe para kadagiti kandidato a natay, nagsanud ti kandidatura na, wenno nadisqualify tapno mairaman ti nagan na iti balota.
Iti isu met laeng a resolusyon, nakailanad a ti substitute para iti kandidato a natay wenno nadisqualify babaen ti final verdict ket mabalin nga agipila ti COC agingga iti tengga ti aldaw ti election day no la ket agpada da ti apilyedo ti kandidato a sukatan na.
