Sumreken ita a lawas iti audit phase ti impeachment trial kontra ken ni Vice President Sara Duterte kalpasan a simmango idi napan a lawas dagiti testigo a nangpaneknek iti panagirruar ken panag-withdraw ti P612.5 milyon a confidential funds ti Office of the Vice President ken Department of Education.
Segun ken ni Tingog Party-list Rep. Jude Acidre, sumaruno a sumango iti impeachment court dagiti testigo manipud iti Commission on Audit tapno ipalawag no kasano nga in-audit ti confidential funds ken no maitunos met laeng iti patakaran ti liquidation ken dagiti naipasa supporting documents.
Manamnama a ti umuna a testigo ket da dati a COA State Auditor Roderick Wamil ken agdama nga Intelligence and Confidential Funds Audit Office Supervising Auditor Celine May Del Campo.
Sumaruno a maipasango ni House Legislative Information Resources Management Department Director Marivic Pareja.
Pinasingkedan ni Acidre a manipud iti panangsapul iti naggapuan ken panang-withdraw ti pondo ket umakar iti agdama ti prosekusyon iti patangan no kasano a nagastos ken no nasayaat a na-liquidate dagiti pondo.
