VIGAN CITY – Nakasagana ti Commission on Human Rights nga agtignay no man bilang malabsing ti karbengan ti tunggal maysa ita a naipatungpalen ti Anti Terrorism Act uray no awan pay laeng ti nayetnag nga Implementing Rules and Regulations ti nasao a paglintegan.
Iti pannaki-uman ti Bombo Radyo Vigan ken ni Spokesperson Jacqueline De Guia, dakkel ti akemda a mangipasigurado a saan a malabsing iti karbengan dagiti tao isu a namnamaenda a karamanda kadagiti mangbukel ti IRR a rumbeng nga urayen met dagiti pannakabagi ti linteg ta adda pay laeng dagiti probisyon iti Anti Terrorism Act a saan a nalawag.
Malaksid iti dayta, namnamaen ti CHR a matungpal dagiti inkarkari idi ti gobierno nga awan iti panagabuso a mapasamak ken saan a malabsing ti karbengan ti tunggal maysa.
Kabayatanna, inlawlawag ti Justice Secretary Menardo Guevarra nga uray no epektibon ti nasao a paglintegan ket kasapulan a mayuray ti IRR tapno nasaysayaat met laeng iti pannakaipatungpalna ken saan a mangallilaw.
