Kiniddaw ti Commission on Human Rights kadagiti pannakabagi ti linteg a surotenda ti maximum tolerance ken siguradoen ti kinatalged dagiti tattao, kangrunaan dagiti ubbing iti panangiserbida iti arrest warrant.
Dayta ket kalpasan a dua ribo a pulis ti napan nangraut iti compound ti Kingdom of Jesus Christ idiay Davao City a mapapati a paglemlemmengan ti religious group founder a ni Apollo Quiboloy nga agingga ita ket saan pay a nasarakan ken natiliw.
Imbilin ti Pasig City regional trial court ti pannakakemmeg ni Quiboloy ken dagiti kaduana a naakusaran gapu iti mapapati a qualified human trafficking, maysa a non bailable offense, ken babaen iti Davao City RTC gapu iti naireport a sexual abuse, exploitation, ken discrimination acts kontra kadagiti ubbing.
Ti met Kingdom of Jesus Christ ket pinaglibakanda dagiti amin a kaso ngem agtaltalinaed latta a nakalibas ni Quiboloy sipud mairuar ti arrest order na.
