Kinarit ni dati nga Ilocos Sur Governor Chavit Singson dagiti agplamplano a mangipila iti kaso kontra kenkuana a mangipilada iti petisyon no kayatda a maisardeng ti dredging operation.
Reaksyon dayta ni Singson kasaruno ti plano a panangipila iti kaso idiay Ombudsman dagiti agindeg iti Caoayan gapu iti nasao nga operasion iti lugarda.
Iti pannaki-uman ti Bombo Radyo Vigan ken ni Singson, awan parikut no isardengda ti dredging operation ngem kunana a saandanton a basul no malayus ti ili.
Inkalintegan ti dati nga opisial nga ar-aramidenda laeng ti pagsayaatan ti probinsia a kunana nga isu payen ti kabaknangan iti intero a pagilian ngem gapu iti apal dagiti inawaganna nga ‘attack dog’ ket ar-aramatendan dagiti tao tapno dadaelan isuna.
Kunana pay nga awan ti kinapudno dagiti maibagbaga nga adu a pagbiagan dagiti agindeg ti nadadael gapu iti nasao nga operasion.
Maipalagip a nagbalin a kontrobersyal ti nasao a banag gapu iti atap ti kaaduan a saan a dredging, no di ket black sand mining ti mapaspasamak a posible a makaapektar iti turismo ken pagbiagan dagiti agindeg.
