Dinayaw ti opisial ti Catholic Bishops’ Conference of the Philippines ti addang ti Bangko Sentral ng Pilipinas nga isina dagiti e-wallet manipud kadagiti online gambling site iti uneg ti 48 nga oras.
Segun ken ni CBCP President Pablo Virgilio Cardinal David, numan pay nasayaat a rugi daytoy ket saan latta a makanay ti simple a pagannurotan.
Impanawaganna ti total ban iti online sugal nangruna ta nalawag iti paglintegan a maiparit dagiti slot machine ken pagsusugalan kadagiti lugar nga open iti publiko malaksid kadagiti accredited a hotel ken resort.
Ngem kunana nga iti panawen ita ket addan kadagiti cellphone ti sugal isu nga uray asino, sadinno, ubbing wenno nataengan ket nadaras a maka-access nga awan ti agbambantay ken awan ti limitasyonna.
Patienna a dakkel ti epektona daytoy iti pamilia, dagiti agtutubo ken dagiti marigrigat gapu ta dagiti gagangay nga umili ken mailumlom iti utang, maadik, ken maawanan namnama uray binilion ti pastrek ti gobierno.
