VIGAN CITY – Balligi ti panangisayangkat dagiti pannakabagi ti linteg ti buy-bust operation idiay Brgy, Dili, Sta. Cruz, maibilang a Drug Cleared Barangay.
Ti suspek ket street level individual, agtawen iti uppat a pulo ket lima, awanan trabaho ken residente ti nasao a lugar.
Iti pannaki-uman ti Bombo Radyo Vigan kenni Police Executive Master Sergeant Benny Cabanas ti Sta.Cruz Municipal Police Station, nakumpiskar manipud ti suspek ti maysa a gramo ti mapapati a shabu nga aggatad ti Php6,800, tallo a medium heat-sealed ken nakalukat a medium plastic sachet.
Adda pay naala manipud kaniana a Php1,000 peso bill, black pouch; maysa a cellphone; maysa a black lighter; maysa a Revolver magnum .22 nga awan serial number-na; innem a live ammunitions; maysa a motorsiklo, ken cash a Php5,230.
Segun kenni Police Executive Master Sergeant Cabanas, ti suspek ket datin a drug surrenderee, ngem ita laeng a mapilaan ti kaso.
Kabayatanna, kinuna ni Police Executive Master Sergeant Cabanas nga awan iti maitedna a pagsayaatan iti panagaramat ti droga, ken inyunay-unayna a saanda a nagkurang a nagpalagip kadagiti agindeg nga i-report da iti kapulisan no adda ammoda nga agar-aramat ti droga.
