VIGAN CITY- Mangisayangkat ti lecture ti Explosive Ordnance Division(EOD) ti Ilocos Sur Police Provincial Office (ISPPO) kadagiti pagadalan inaig kadagiti rumbeng nga aramiden no adda ti ‘bomb threat’ kas ti napasamak idiay Cabugao North Central School idi naminsan nga aldaw.
Segun kenni Police Supt. Ernesto Navaro, provincial director for operations ti EOD, tarigagayan da a maiyadal kadagiti estudyante ken mangisursuro dagiti rumbeng nga aramiden tapno saan da nga agdanag ken agbuteng no adda dagiti nasao a klase ti pasamak.
Maipalagip nga idi naminsan nga aldaw ket nariribok ti klase dagiti estudyante ti gapu iti text message a naawat ni Florence Briones a nagapu iti suspek a ni Benjie Susulin, nga adda ti naimuntar a bomba iti CR ken classroom ti grade 2 ken grade 5 iti nasao a pagadalan
Gapu iti dayta ket sumango ni Susulin ti kaso a panaglabsing iti Presidential Decree 1727 wenno Anti-Bomb Joke Law .
