Kwinestyunaran ti Malakanyang ti naipakaammo a bomb threat iti Office of the Vice President (OVP) idiay Mandaluyong City.
Segun ken ni Palace Press Officer Claire Castro, rumbeng laeng a mangiruar ti OVP iti sibubukel a detalye iti nasao nga insidente.
Dayta ti sungbat ti Malakanyang iti saludsod nu rumbeng nga adda ikaalarma iti publiko mainaig iti sumagmamano a bomb threat iti pannakakemmeg ni dati a President Rodrigo Duterte.
Kinunana nga adu iti mabalin nga agaramid iti istorya ken ibagada nga adda a bomb threat iti lugar uray awanen su a nasaysayaat nga ipakita ti OVP iti detalye manipod ti opisinada.
Maipalagip nga immunan a kinuna ti OVP a maysa a kamengda iti nakaawat ti text message a naglaon iti bomb threat isunga insigida a naiyakar dagiti OVP staff iti maysa a secured area ngem awan iti nakita nga explosive devices iti Explosive Ordnance Disposal Team iti Mandaluyong Police.
