Kayat ni Senador Raffy Tulfo a sumango ti Bureau of Customs (BOC) iti panagdenggeg ti Senate Blue Ribbon Committee mainaig ti flood control projects.
Ti addang ket tapno mabigbig nu nagbayad iti husto a buwis ti negosyante a ni Sarah Discaya iti duapulo ket walo a luxury vehicles.
Immunan nga impakaammo ni Senate Minority Leader Vincente Tito Sotto III a mainaig ti panagserrek ti smuggled vehicles ti dealer dagiti lugan ni Discaya.
Kabayatanna, nasaludsud pay ti MG Samidan Construction a naalada ti P5.022 billion a flood control projects uray ti paid-up capital-na ket umabot laeng iti P250,000.
Impaganetget ti akin-kukua ti MG Samidan a ni Majorie Samidan nga awan ti ghost flood control projects-da.
Nangrugi payen iti imbestigasyon ti Wawao Builders a mainanaig iti dadduma a ghost flood control projects idiay Bulacan ngem nagkedked a sumungbat iti akin-kukua a ni Mark Allan Arevalo kas balakad ti abogadoda.
Rimmuar pay iti panagdenggeg a dagiti tallo a miembro ti Philippine Construction Accreditation Board ket agpapadada a contractor.
Segun ken ni PCAB Chairperson Dr. Perciles Dakay, adda lisensyada idi ngem awanen ita.
Impaganetget met ni Senador Erwin Tulfo a rumbeng nga insigida a masukatan dagiti miembro ti PCAB gapu ti conflict of interest.
