Pinasingkedan ni House Impeachment lead prosecutor Atty. Gerville “Jinky” Luistro a posible a naglaon iti napapateg nga ebidensya ti nakaselyo a box manipod Bureau of Internal Revenue (BIR) maipanggep ti alegasyon nga unexplained wealth kontra ken ni Vice Pres. Sara Duterte.
Segun ken ni Lusitro, mabalin a makatulong dagiti dokumento iti uneg ti box tapno mapaneknekan wenno maadal dagiti pammabasol a saan a naideklarar a baknang, pagkurangan ti pannakaideklarar ti Statement of Assets, Liabilities and Net Worth (SALN) ken mapapati a saan a panangtallikod iti interest iti negosyo.
Ti BIR box ket nairaman iti rekord ti impeachment proceedings idi Abril ngem agtaltalinaed a nakaselyo kalpasan nga inkeddeng ti House Committee on Justice gapu kadagiti posible nga isyu ti legal maipanggep ti confidential tax records.
Kinuna ni Luistro a kayat koma ti komite a lukatan ti box idi ngem nagannadda tapno maliklikan ti posible a panaglabsing kadagiti probisyon ti National Internal Revenue Code.
Innayonna a nakasagana ti prosecution panel nga ipila ti posisyonda iti impeachment court no kasapulan a matratar ken lukatan ti BIR box kadagiti sumarsaruno a panagdenggeg.
