VIGAN CITY – Pinasingkedan ti Department of Migrant Workers babaen iti Migrant Workers Office idiay Kuwait a sangapulo ket maysa nga overseas Filipino workers ti naapektaran iti pannakauram ti pasdek a pagdagdagusan dagiti gangannaet a mangmangged.
Iti report a naipatulod ken ni Migrant Workers Secretary Hans Leo Cacdac, kinuna ti Migrant Workers Office-Kuwait a tallo kadagiti sangapulo ket maysa ti natalged idinto a dagiti tallo ket adda iti ospital – dua ti adda iti intensive care nga agpapalaing kadagiti dunor a sinagrapda.
Ti met kasasaad dagiti lima nga OFW ket nakapempen pay laeng ti kumpirmasyonda manipud kadagiti otoridad ti ospital.
Binilin ni Secretary Cacdac ti MWO-Kuwait ken ti Overseas Workers Welfare Administration Welfare Office idiay Kuwait a kitaen nga insigida ti kasapulan dagiti innem pay nga OFW.
