Umaboten iti 3,383 a pamilia wenno 12,013 nga indibidual ti naibakwit iti probinsia ti Ilocos Sur gapu iti bagyo Emong.
Iti pannaki-uman ti Bombo Radyo Vigan ken ni Ilocos Sur Provincial Disaster Risk Reduction and Management Officer Rhon Arquelada, nakaibayog pay laeng iti red alert ti status-da uray no naikkaten ti Tropical Cyclone Wind Signal No 4 nga immuna a naibayog iti southwestern portion ti probinsia.
Innayonna a saan a nasken nga agpakampante dagiti agindeg gapu iti posible a napigsa a tudo ken angin gapu iti bagyo isu a nasaysayaat latta no agsagana ken agbakwit no kasapulan.
Epektibo met ti insayangkatda a pre-emptive evacuation sakbay pay ti iduduprak ti bagyo nangruna kadagiti adda iti high risk areas.
Binalakadanda dagiti agindeg a kanayon nga agisagana iti emergency go bag, amuen ti kaasitgan nga evacuation center iti lugarda ken makidamag no ania ti sasaadenen ti panawen.
