Balligi ti panangisayangkat ti Bureau of Fire Protection-Narvacan iti information drive kadagiti coastal barangay iti nasao nga ili gapu iti pangta ti tsunami a posible nga itunda ti gingined a mapaspasamak iti kabaybayan ti Sta. Catalina.
Iti pannaki-uman ti Bombo Radyo Vigan ken ni Fire Senior Inspector Romeo Medrano, tallo a coastal barangay ti napananda pakairamanan ti San Pedro, Pantoc, ken Sulvec.
Kadua ti BFP-Narvacan dagiti maseknan nga ahensia kas ti Provincial Disaster Risk Reduction and Management Office, Department of Social Welfare and Development, Philippine Coast Guard ken dadduma pay a nangipaganetget kadagiti agindeg kangrunaan kadagiti barangay official ken tanod no ania dagiti nasken nga aramidenda no dumteng ti didigra.
Inyunay-unay ni Medrano a saan nga ang-angaw ti nasao a banag isu a kasapulan ti panagbalin nga alerto ken panagbakwit nga insigida no marikna dagiti pagilasinan iti tsunami.
