VIGAN CITY – Kinagaed a mangragpat iti arapaapna manipud kinaubing iti nangiduron ken ni Atty. Lovely Ann Lazo tapnu maipasa na ti 2019 BAR Examinations.
Segun ken ni Atty. Lazo, idi iyur-uray na iti resulta iti BAR exams ket mapukpukawen iti namnama na a makapasa ta narigat iti examda ken aklunen na nga adda dagiti saludsod a saan na a nasungbatan a sigud ngem gapu iti tulong ti Namarsua ket nagun-od na iti arapaap na nga agbalin nga abogada.
Ti agdama, saanna pay nga ammo no ania ti sumaruno nga addangna kalpasan iti pannakapasana iti nasao nga exam ta rikriknaenna pay laeng iti kinaragsakna.
Kabayatanna, ti kalikagum nga agserbi iti sabali a tao iti rason ni Atty. Mark Bernard Taculog a taga- Narvacan tapnu ipasa na ti 2019 BAR Examinations uray nu idi damo ket saan na a napagasatan iti makapasa.
Kas paset iti panagsagana ni Atty. Taculog iti BAR Exams, inadal na amin a masapul a maamuan na iti benneg ti Remedial Law ta isu iti kaaduan iti porsyento iti nasao nga exam.
Ti agdama, tultulungan na pay laeng iti pamilya na iti panangmanehar iti negosyo da ngem inton malpas ti quarantine gapu ti COVID- 19 ket plano na iti ag-apply iti trabaho iti gobyerno.
Ti sabali a bangir, saan a mamati ni Atty. Meilyn Corotan Padua a taga- Bahet, San Ildefonso a naisakad na iti panagadal na ti Law ken kasta payen iti pannakapasa na ti BAR exams.
Nag-working student ni Atty. Padua tapnu maka-adal ti Law idiay University of Northern Philippines ken gapu ti bain na a dumawat iti igatang na iti libro ken dadduma pay a masapul na nga agbasa kadagiti nagannak na.
Binalakadanna dagiti agkalkalikagum nga agbalin nga abogado nga igagaedda iti agadal tapnu magun-od da iti arapaap da ken saan da a liplipatan ti Namarsua.
