Nainaguraran ti baro a satellite office ti Overseas Workers Welfare Administration iti ili ti San Ildefonso, Ilocos Sur.
Iti pannaki-uman ti Bombo Radyo Vigan ken ni Gerardo Rimorin, pagyamananna ti San Ildefonso Local Government Unit ta libre a naipaay daytoy kadakuada.
Ibilang ni Rimorin a dakkel a banag daytoy tapno matulongan dagiti umili iti benneg ti scholarship program, reintegration, medical assistance, ken welfare cases.
Mangnamnama ti opisial a babaen ti pannakaipasdek ti OWWA iti nasao nga ili ket ad-adu pay ti matulongan.
Segun iti maysa a retirado nga Overseas Filipino Worker nga immatendar iti event a ni Carmelita Palomares, pagyamananna ti pannakaipasdek ti opisina iti nasao nga ili ta saandan a kasapulan ti mapan kadagiti naad-adayo nga opisina.
Linagipna pay dagti naitulong kenkuana ti OWWA kadakuada nangruna iti pinansial a tulong ta nagpatulong idi ni Palomares iti OWWA gapu iti anakna a nagawid manipud Saudi gapu iti pannakalugi ti nagtrabahoanna ket naipaayan met iti tulong.
Iti agdama, siam ti satellite office ti OWWA iti Region 1 ta adda idiay Laoag ken Pasuquin idiay Ilocos Norte; Tagudin, Candon City, ken San Ildefonso iti Ilocos Sur; ken Alaminos, Urdaneta, ken Dagupan idiay Pangasinan.
