VIGAN CITY- Dead on arrival ti drayber ti motorsiklo gapu iti aksidente a napasamak iti national highway ti Brgy. Guimod, Bantay a nakairamanan dagiti tallo a lugan.
Ti Yamaha Mio 125 ket minaneho ti biktima a ni Nathaniel Vien Dela Cruz Riduca, agtawen iti duapulo, a taga san Sebastian, San Vicente.
Ti drayber ti Isuzu Elf ket nabigbig a ni Rex Quindag Rabbon, agtawen ti tallopulo ket innem, naasaawaan a taga Brgy. Villamar, Caoayan.
Kabayatanna, ti met nagmaneho iti kurong-kurong ket ni Eric Cabading, agtawen iti uppat a pulo ket innem, naasawaan a taga Brgy. PArada Sto Domingo.
Basar iti naala a CCTV footage, agpapaamianan a direksyon ti kurong-kurong idi inovertakean ti motorsiklo ngem nasagidna isu a naawanan ti kontrol ti drayber ti motorsiklo ket immagaw iti linya a puon iti nagdinnungparanda iti truck.
Nadunor ti nadumaduma a paset ti bagi dagiti drayber ti kurong-kurong ken motorisklo nga agpada a naipaagas iti Northside Hospital ngem saan a nakalasat ti drayber ti motorsiklo idinto a ti drayber met ti truck ket naipan iti Metro Vigan Hospital para iti pannakatamingna.
