Maisagsaganan ti kaso a sangwen ti maysa a barangay tanod a nagprobokar panagpaputokna iti paltog idiay Barangay Darapidap, Candon City, Ilocos Sur.
Nabigbig ti suspek a ni Roberto Galaites Balbin, agtawen iti limapulo ket uppat, Barangay Tanod, taga-Barangay Darapidap iti nasao a siudad.
Dagiti biktima ket da Alex Gramaje Gazo, agtawen iti limapulo ket maysa, ken maysa a menor de edad nga agpada a taga-Barangay Darapidap, ken ni Benjamin Gagarin Ballejos, agtawen iti limapulo ket lima, retired government employee, taga-Barangay Caterman.
Iti pannaki-uman ti Bombo Radyo Vigan ken ni PLTCOL Rodel Del Castillo, agin-inom ti suspek ken ni Gazo idin ta rimsua ti saanda a panagkinnaawatan; nagdesisyon ni Gazo nga isardengnan ti uminom ket nagawid.
Ngem sinurot ti suspek a nagpakadua kenkuana nga agawid kagiddan ti panangdanugna iti tyan ni Gazo.
Iti dayta a kanito, nakita ti menor de edad ti panangdanog ti suspek ken ni Gazo isu a bimmallaet ngem dinanog met isuna ti suspek.
Nakita met ni Ballejos ti pasamak ket pinadasna nga inanawa ti suspek iti panangdanogna iti menor de edad ngem insublatna daytoy a dinanog.
Dagus a nagpatulong ti witness ken ni Barangay Chief Tanod Joel Manzano Ramirez ket rinespondeanda ti pasamak agingga a naanawa ken pimmanaw ti suspek.
Kalpasan ti apagbiit a kanito, nagsubli ti suspek a nakamotorsiklo a nangprobokar ken ni Gazo iggem ti mapapati a caliber 22 a paltog ken imputokna.
Naisayangkat ti hot pursuit operation para iti pannakakemmeg ti suspek.
