VIGAN CITY – Mamati ni Cagayan de Oro 2nd District Rep. Rufus Rodriguez a saan a makanay iti nasurok dua a tawen a panagtakem dagiti barangay ken sangguniang kabataan officials isu’t gapu na nga anamongan na iti pannakaisanud iti eleksyon kadagiti baro nga opisyal ti barangay ken SK a maisayangkat inton umay a tawen.
Segun ken ni Rodriguez iti pannaki-uman kenkuana ti Bombo Radyo Vigan, kayat da nga inton maikadua a Lunes ti May, 2023 a maisayangkat ti barangay ken SK elections tapnu adda iti makatawen a panagsagana ti Commission on Elections (Comelec).
Para ti kongresista, awan iti maaramidan dagiti barangay ken SK officials nu dua a tawen da laeng nga agtugaw iti puwesto ta dagiti naduma-duma a proyekto ket saan met a malpas iti uneg laeng ti makatawen wennu dua a tawen.
Kabayatanna, iti met biyang ti Comelec, inpakaammo ni Comelec spokesman James Jimenez iti pannaki-uman kenkuana ti Bombo Radyo Vigan a nakasagana da iti pannakaisanud iti nasao nga eleksyon ta iti kina-agpayso na ket agin-inayad da pay a mangipatungpal kadagiti nakakalendaryo nga aramiden da ta namnamaen dan a maisanud manen iti eleksyon.
