VIGAN CITY – Idaulwan iti opisina ti Undersecretary for Barangay Affairs ti Department of Interior and Local Government (DILG) iti panangipila iti kaso ken panangpasardeng iti trabaho dagiti barangay chairman a saan a makaipatungpal ken makamantinir iti road clearing operations iti lugar da.
Dayta iti inpasigurado ni Usec. Martin Diño iti pannaki-uman kenkuana ti Bombo Radyo Vigan inaig iti baro a memorandum circular ti DILG inaig iti maikadua a bansada ti road clearing operations nga agpaot iti uneg ti pito pulo ket lima nga aldaw.
Segun ken ni Diño, masapul a mapagtalinaed dagiti nakatugaw a barangay chairman a nadalus dagiti igid iti kalsada kadagiti lugar a pagturayan da kontra kadagiti iligal nga agpaparking ken kadagiti illegal sidewalk vendors ta saan nga agpangadua a mangipila iti kaso kontra kadakuada ken ipaikkat na ida iti puwesto nu mapaneknekan a saan da nga ar-aramiden iti trabaho da.
Kagiddan iti dayta ket inallukoy na iti publiko a siputan ken ireport da iti opisina na nu siasino dagiti saan a sumur-surot iti nasao a bilin ta ikkan na ida iti pagnakman da.
