VIGAN CITY – Hustisya iti kiddaw ti pamilya ti babai a nasarakan a natay idiay Brgy. San Antonio, Bangued, Abra.
Maipalagip a nasarakan ti bangkay ni Crizia Libuen, 23 anyos, practice teacher nga estudyante ti Abra State Institute of Science and Technology ken tubo ti Naglibacan , Tineg, Abra ngem agnanaed idiay Bangbangar, Bangued.
Segun ti pamilya ti biktima, nakaam-ames iti napasamak iti anak da gapu ta napno ti litem, sinit ti sigarilyo ken kagat iti nadumaduma a paset ti bagi na sabali pay iti duwa a tama ti bala iti ulo na.
Kabayatanna, boluntaryo a nagturong iti istasyon ti pulisya ti nobyo ti biktima a maysa a graduating engineering student tapno madalusan ti nagan na manipud iti anya man a panagdudua kontra kenkuana.
Immunan a kinumpirmaean ni Sr. Insp. Grace Marron, information officer ti Abra Provincial Police Office a maibasar iti imbestigasyon, naudi a kadwa ti biktima dagiti gagayyem na iti maysa a drinking session ngem saan nga imminom ti arak isuna.
Maiyur-uray pay laeng ti resulta ti otopsiya ti bangkay ti biktima tapno maammuan iti pudno a napasamak ken no usto iti atap a narames ti biktima sakbay a napapatay.
