Saan a mabalin a maiyawid iti pagilian ti bangkay ti Pilipino a nabitay idiay Saudi Arabia gapu iti maipatpatungpal a linteg iti nasao a pagilian.
Segun ti Philippine Embassy idiay Riyadh, saan nga impalubos iti Kingdom of Saudi Arabia a maiyawid kadagiti nagtaudan a pagilian dagiti nabitay iti lugarda.
Kinuna ni Riyadh Charges d’ Affairs Rommel Romato, uray kayatda nga iyawid ti Pilipino ket saan a mabalin ta uray dagiti napalabas nga execution ket isu met laeng iti nagbalin a procedure.
Maipalagip nga idi October 5 ket nabitay ti Pilipino gapu iti panangpatayna ti maysa a Saudi national ket saan nga immanugot ti pamilia ti biktima a naki-areglo wenno umawat ti blood money.
Napatay ti Pilipino ti biktima babaen ti panangmartilyona iti ulona kalpasan a nagririda gapu iti negosyo.
