Awan ti makitkita dagiti pannakabagi ti linteg a foul play iti pannakatay ti maysa a lalaki a nasarakan ti bangkayna iti kamposanto idiay Barangay Bonifacio, Cabugao, Ilocos Sur.
Ti lalaki ket agtawen iti uppat a pulo ket tallo, agnaed iti nasao a lugar, ken mapapati nga adda parikut ti panagpampanunotna.
Iti pannaki-uman ti Bombo Radyo Vigan ken ni Police Major Juan Jhayr Maggay iti Cabugao Police Station, awan ti makita a dunor iti bagi ti lalaki a daytoy ket agruprupsan idi masarakan.
Sinapul ti pamiliana ti lalaki iti kamposanto ta ammoda nga idiay ti pagtamtambayanna, ngem saanda a nagballigi iti damo agingga nga iti maikadua a pananggandatda a mangsapul idi kalman ket nakaangotda iti nabangsit ket nakitada ti bangkayna.
Maipalagip a ti lalaki ket nasarakan a naisab-it iti alad a mapapati nga immulianna, a ti kangatona ket lima a kadapan.
