VIGAN CITY – Naisangpeten iti Pilipinas ti bangkay dagiti tallo nga Overseas Filipino Workers (OFW) a natay gapu ti uram a napasamak iti maysa a residential building idiay al-Mangaf, Kuwait.
Pasado alas kuatro iti malem iti Hunyo 17, 2024 a simmangpet ti Terminal 3 iti Ninoy Aquino International Airport ti eroplano a nagiluganan kadagiti natay a da Jesus Lopez, Edwin Petras Petilla, ken Jeffrey Fabrigas Cayubay.
Sinabat da Department of Migrant Workers (DMW) Secretary Hans Leo Cacdac ken Overseas Workers Welfare Administration (OWWA) Administrator Arnel Ignacio kaduada ti pamilia dagiti natay nga OFW.
Kabayatanna, adda pay dua a nadunor a kailian ket pinasingkedan ni Former Department of Migrant Worker Spokesperson Tobby Nebrida a maysa kadakuada ket kritikal ti kondisyonda nga agtaltalinaed iti Intensive Care Unit idinto a ti maysa ket mabambantayan pay laeng.
