Nagpanawagan ni Senador Bam Aquino iti Department of Education a dagus nga iruar ti P65 billion a pondo para iti panangipatakder kadagiti klasrum kadagiti local government unit tapno maliklikan ti pannakataktak ti proyekto.
Nadismaya ni Aquino iti nabuntog a panangi-download ti pondo ta kunana a 99 laeng iti target a 1,700 a klasrum ti naipatakder ti Department of Public Works and Highways idi 2025.
Inyunay-unayna a no maitantan pay ti pondo ken abuten ti panagtutudo ti konstruksion ket ad-adda daytoy a bumuntog.
Namnamaenna a maipasa ken maipatungpal ti Classroom-Building Acceleration Program (CAP) Act tapno mapadaras ti pannakaipatakder dagiti klasrum babaen iti tulong dagiti LGU ken NGO, ken masupusupan ti pagkuranganna nga umabot iti 166,000 classroom iti pagilian.
