Impaganetget ni House Prosecutor ken Bicol Sara Rep. Terry Ridon a kasapulan a maadal ti nagtaudan ti naireport nga P88.5 million net worth ni Vice President Sara Duterte idi 2024 manipod idi 2007, idi rinugianda iti serbisyo publiko.
Segun ken ni Ridon, saan nga umdas a kitaen laeng dagiti rekord manipod 2022 ta napateg a masubaybayan ti pakabuklan a sapul, sanikua ken dagiti utang a nakalanad iti Statements of Assets, Liabilities and Net Worth (SALN) manipod 2007 agingga 2024.
Kinunana pay a napateg dagiti rekord manipod Bureau of Internal Revenue (BIR), Anti-Money Laundering Council (AMLC) ken dagiti bank account tapno maikumparar kadagiti SALN ni Duterte ken mabigbig no adda sanikua wenno deklarasyon a saan a nailanad.
Inyunay-unayna nga aramaten dagiti prosecution dagiti dokumento kas ebidensya iti impeachment trial ket addan iti Senate impeachment court iti pangngeddeng no kasanoda nga ipateg.
