VIGAN CITY – Saanen a kinasoan ni Leticia dela Cruz Torricer nga agtawen iti innem a pulo ket uppat ti asawa na a ni Carlito Tabbilos Torricer nga agtawen iti pito pulo ket maysa a nangtagbat kenkuana idi parbangon ti May 28 idiay Barangay Sived, Sto. Domingo.
Segun ken ni Carlito, napan da naki-birthday nga agassawa iti karruba da idi nakita na ti lalaki a mapapati a nangkarawa ken ni Leticia idi napalabas a tawen isu a pimmanaw tapnu saan a mairubo ket idi nakaawiden, simmaruno met laeng kenkuana ti asawa na ket nagsango da pay a nangan sakbay da a naturog.
Gapu ta napigsa iti tudo, agkurkuridemdem a bimmangon ni Carlito ket bigla a tinagbat na ti biktima ta inpagarup na nga isu ti lalaki a nangkarawa iti asawa na idi napalabas a tawen.
Insigida met a nagpaarayat kadagiti karruba da ti biktima isu a naitaray nga insigida iti ospital para iti pannakataming na.
Inlawlawag ni Leticia a saan nan a kinasoan ti asawa na ta awan met iti nagap-apaan da a dua sakbay iti pasamak malaksid laeng iti arigna kanayon a pannakalaglagip ti asawa na iti napasamak kenkuana idi napalabas a tawen, nangruna nu makainom ni Carlito.
Kabayatanna, pinasingkedan met ni Police captain Christopher Ramat, hepe ti Sto. Domingo municipal police station nga awan iti rekord iti pulisya dagiti agassawa malaksid laeng iti napasamak idi kalman ket nu bilang maulit to manen iti panangtagbat ni Carlito ken ti asawa na, nakadependen to latta ken ni Leticia nu pakawanen na wennu saan.
