Imbilin ni Agriculture Secretary Francisco Tiu Laurel Jr. ti imbestigasion iti mapapati a pannakaipuslit dagiti imported carrots ken broccoli a mangapektar iti pagbiagan dagiti lokal a mannalon ditoy Cordillera.
Daytoy ket kalpasan ti monitoring operations idiay Baguio City ken La Trinidad, Benguet, no sadino a naduktalan ti imported broccoli a namarkaan iti “Product of China” nga ilaklako ti maysa a supplier manipud Divisoria.
Segun kadagiti report, marigatan dagiti lokal a mannalon a mangilako kadagiti produkto da gapu kadagiti nalaklaka nga imported a nateng nga aggatad iti ₱250 iti kada kilo.
Nangala metten ti Bureau of Plant Industry kadagiti sample ti nateng tapno maammuan no adda formalin wenno heavy metals a mabalin a mangdangran iti salun-at dagiti consumers.
Nagpakdaar ti Department of Agriculture a mabalin a madusa dagiti maduktalan nga naglabsing iti Anti-Agricultural Economic Sabotage Law.
Naisingasing met ti pannakitinnulong ti DILG ken DTI para iti naing-inget a panang monitor iti merkado ken tapno masalakniban dagiti lokal a mannalon.
~Bombo Kleo
