VIGAN CITY – Estafa ti maipila a kaso ti maysa a babai a dati a karelasyon ti biktima idiay Lingsat, Sta Maria.
Iti pannakiuman ti Bombo Radyo Vigan kenni Plt Joel Dasargo ti Sta. Maria PNP , inreklamo ti biktima a ni Mark Anthony Alegre, agtawen ti tallopulo , maysa nga Analyst ti maysa a bangko idiay Brgy San Nicolas Candon ti dati na a nakarelasyon a ni Karen Ruth Felix, agtawen ti duapulo ket pito , empleyado ti maysa a pawnshop iti ili ti Sta Maria.
Abril katorse ti agdama a tawen, pinagtalkan ti biktima ti suspek ti kuarta nga aggatad ti 91,000 pesos a naited babaen ti bank transactions .
Segun ti biktima, naibaga kenkuana nga adda iti pautangan ti biktima ket idi singirennen ti lalaki ti dati na a nobya, nangipatulod ti agggatad duapulo a ribo a pisos ngem saanna a binayadan dagiti nabatbati a gatad ti utangna.
Malaksid iti dayta, natakuatan nga awan ti pinautangan ti babai a sabali nga isu iti inrasonna iti dati na a karelasyon ngem itan ket desisdido ti biktima a kasoan ti suspek.
