VIGAN CITY – Balligi ti pannakakemmeg idi tingnga iti aldaw idi October 1 iti naiwayat nga entrapment operation ti nagtitipon a puwersa dagiti otoridad idiay Vigan Centro Mall, Barangay 3, Vigan City ti maysa a babai nga agilaklako iti daga a saan na a kukua.
Nabigbig ti suspek a ni Ma. Carmelita Agustin , agtawen ti tallo pulo ket siam, naasawaan ken agnaed idiay Brgy. San Julian Norte, Vigan City.
Segun ken ni Police Staff Sgt. Robinson Tabrilla, linoko ti suspek ti biktima a ni Jenalyn Sagulang, agtawen ti tallo pulo ket siam, naasawaan, ken agnaed idiay Barangay Capangpangan, Vigan City, iti panangilako na ti daga ni Severino Acena a ti kalawa na ket 285 square meters idiay Cabaroan Laud uray nu awan iti karbengan na a mangilako iti nasao a daga agsipud ta ti special power of attorney na a kas broker ket nawaswasen.
Pinasingkedan pay ni Tabrilla nga adun iti nakapenpen a kaso ti suspek nga estafa iti isu met laeng a modus a panagilako ti daga a saan na a kukua ken saan a dumanun kadagiti akin-kukua dagiti daga nga ilaklako na iti kwarta a paglaklakoan na.
