VIGAN CITY- Natalgeden iti kasasaad ni Marilou Racadio nga agtawen iti tallo pulo ket walo a binagkong ti asawa na a ni Fredelito Racadio nga agtawen iti uppat a pulo ket tallo gapu ti nakaro nga imon ken pannakainom ti arak.
Segun iti impormasyon, nadait laeng iti dunor ni Marilou iti baba ti akin-kannigid a barukong na gapu ti panangbagkong kenkuana ti asawa na isu a nalasatan nan iti peggad iti biyag na.
Maipalagip a maibasar iti pannaki-uman ti Bombo Radyo Vigan ken ni SPO4 Menardo Vivit, Municipal Executive Senior Police Officer ti San Juan municipal police station, nabagkong ni Fredelito ti biktima ta naduktalan na nga adda iti ka-chat na iti social media nga isu ti nagimunan na.
Ti agdama, nakakustodiya idiay San Juan municipal police station ti suspek kabayatan a maisagsagana iti kaso kontra kenkuana ngem maiyuray pay iti desisyon ti asawa ken pamilya na nu ituloy da ti darum wennu saan.
