Nadunor dagiti tallo a nagkakalubbon iti motorsiklo gapu iti pannakaidungparda iti trak iti provincial road ti Barangay Bayubay Sur, San Vicente, Ilocos Sur.
Ti nagmaneho iti Isuzu Aluminum Van Truck ket agtawen iti tallopulo ket dua.
Ti met Yamaha Mio 125 motorcycle ket minaneho ti agtawen iti duapulo, taga-Purok Bassit, Vigan City.
Kinalubbonna da ti agtawen iti duapulo a babai, taga-Barangay Tamorong, Sta. Catalina ken ti maysa pay a babai nga agtawen iti duapulo ket uppat, taga-Barangay Callaguip, Caoayan.
Iti pannaki-uman ti Bombo Radyo Vigan ken ni Police Captain Pedro Halover iti San Vicente Police Station, sumrek ti trak iti provincial road nga agpa-amianan idin ta aksidente a dinungpar ti motorsiklo a mapapati a napaspas ti tarayna.
Nagsagaba iti dunor ti ulo ti drayber ti motorsiklo nga isu ti kritikal ti kasasaadna gapu iti pannakaitamana iti likudan a pilid ti trak idinto a minor injuries ti sinagaba dagiti kinalubbonna.
Saan met a naan-ano ti drayber ti trak ken nakasagana a tumulong iti kasapulan dagiti nadangran.
Dagiti nagkakalubbon iti motorsiklo ket nakainom idi mapasamak ti aksidente.
