Sukisoken ti Legislative Energy Action Development (LEAD) Council dagiti ayuda program ti gobierno kadagiti sektor nga apektado ti oil price shock gapu iti panagngato ti presio ti langis iti world market gapu iti tension idiay Middle East.
Daytoy ti kinumpirmaran ni House Committee on Ways and Means Chairman ken Marikina Rep. Miro Quimbo iti agenda da iti maikadua nga aldaw ti LEAD Council hearing.
Binukel ni House Speaker Faustino “Bojie” Dy III ti lead council tapno agaramid ti linteg a mangrisut iti problema ti krisis ti langis ken isagana ti pagilian iti kastuy a sitwasion iti masangoanan.
Segun ken ni Quimbo, partikular a maammuan kadagiti ahensia ti gobierno ti estado ti ayuda program da iti agduduma a sektor a mangrugi iti sektor ti transportasion.
Karaman pay a maammuan no mano ti pondo ti nailatang para iti nadakamat a programa ken parte ti paggappuan na.
