Idurduron ni dati a Presidente nga agdama a Pampanga Rep. Gloria Macapagal Arroyo ti maysa a gakat tapno ikkan ti trabaho dagiti Pilipino imbes a maikkan isuda ti ayuda.
Iti salinong ti House Bill (HB) 4972 wenno “Bayanihan Work Program”, pinasingkedan ni Arroyo nga imbes a monetary aid ket nasaysayaat a maikkan ti trabaho kadagiti programa ti gobierno iti aglawlaw, imprastruktura, care service, educational support, disaster preparedness ken dadduma pay.
Idurduron ti dati a president a maaddaan ti National Job Guarantee Program wenno Bayanihan Work Program nga kitaen ti Department of Labor and Employment (DOLE) iti pannakibinnulig iti Local Government Units (LGUs), Department of Education (DepEd) ken Technical Education and Skills Development Authority (TESDA).
Amin a Pilipino nga agtawen ti sangapulo ket walo agpangato a kayat na nga agtrabaho kadagiti programa ti gobierno ket masapul nga agpa-rehistro no kayat da a maaddaan ti temporario a trabaho bayat a saan da pay a nakakita ti trabaho iti pribado a sektor.
Ti agbalin a sweldo da ket maibasar iti magmagna nga minimum wage iti rehiyon da ken maaddaan da pay PhilHealth ken Social Security System (SSS) benefits.
