Inlawlawag ti maysa nga abogado a ti archival iti impeachment case kontra ken ni Vice President Sara Duterte ket saanna kayat a sawen a nawaswasen ti kasona.
Iti pannaki-uman ti Bombo Radyo Vigan ken ni Atty. Edwin Concepcion, adda nagdumaan ti archival ken dismissal ta no archival laeng ket kayatna a sawen nga inactive ti kaso idinto a no dismiss ket nawaswasen.
Ti addang ket kasaruno iti panangkiddaw ti House of Representatives babaen iti Office of the Solicitor General iti motion for reconsideration.
Adda turay ti Senado nga agdesisyon no ania a wagas ti aramidenda iti kaso, ngem iti agdama, urayenda ti desisyon ti Korte Suprema kas panangirespeto iti mosyon ti Kongreso.
Nupay kasta, mabalinto latta a ma-reactivate ti kaso ti bise presidente iti ania man nga oras ta saan a dismissal ti napasamak ken posible nga ireverse ti Korte Suprema ti desisyonda.
