VIGAN CITY – Awanen ti checkpoint ken saanen a kasapulan iti pass slip iti ili ti Caoayan ngem adda dagiti baro a pagannurotan a naiyetnag kas pinasingkedan ni Mayor Germy Goulart.
Iti pannaki-uman ti Bombo Radyo Vigan kenni Goulart, kasapulan laeng a dagiti negosyante nga aggapu iti sabali a lugar a mapan aglako ti kasapulan a makaala ti pass slip a para kadagiti Authorized Person Outside Residents (APOR) iti munisipioda ken ti certificate manipud iti kapitan a mangpaneknek nga isuda ket agnegnegosyo.
Inlawlawag ni Goulart a makastrek dagiti tao nga aggapu iti sabali a lugar nga adda iti napateg a gagarada ngem saan a rumuar dagiti agindeg iti nasao nga ili ken masurot latta dagiti dati a pagannurotan kas ti curfew hour, liquor ban, social distancing ken malimitaran dagiti sumrek kadagiti pagtagilakuan tapno malapdan iti panagraira ti virus.
No iti met pannakaisayangkat ti misa ket saan a parikut kenkuana no la ket suroten dagiti mangidaulo iti simbaan dagiti pagannurotan a naiyetnag.
